Gwyddonydd Iechyd Cyhoeddus Amgylcheddol

Trosolwg o'r swydd

I ategu ein tîm presennol, mae Iechyd Cyhoeddus Cymru yn awyddus i benodi Arbenigwr Iechyd Cyhoeddus brwdfrydig a llawn cymhelliant i swydd Gwyddonydd Iechyd Cyhoeddus Amgylcheddol yn ein His-adran Diogelu Iechyd. Mae'r swydd hon ar gael ar sail 1.0 WTE tan ddiwedd mis Mawrth 2023 fel Secondiad.

Caiff y Gwasanaeth Iechyd Cyhoeddus Amgylcheddol ei ddarparu ar y cyd gan Iechyd Cyhoeddus Cymru a swyddfa cyfarwyddiaeth Ymbelydredd, Cemegion a'r Amgylchedd Asiantaeth Diogelwch Iechyd y DU yng Nghaerdydd. Trefniant unigryw ydyw.

Yn gyffredinol, nod y Gwasanaeth yw diogelu a gwella iechyd mewn perthynas â niwed a buddiannau amgylcheddol, yn ogystal ag atal niwed rhag cael ei achosi gan beryglon amgylcheddol. Mae'n darparu gwasanaethau adweithiol yn unol â gofynion y Ddeddf Argyfyngau Sifil, gan ymateb i amrywiaeth eang o ddigwyddiadau amgylcheddol wrth weithio gyda phartneriaid amlasiantaethol i ddiogelu pobl Cymru. Fel rhan o'r tîm, byddwch yn rhoi cyngor a mewnbwn arbenigol ar reoli materion sy'n ymwneud ag iechyd cyhoeddus amgylcheddol, gan arwain yr ymateb i ddigwyddiadau yn ôl y gofyn.

Mae'r Gwasanaeth hefyd yn gweithio'n rhagweithiol i fynd i'r afael â phenderfynyddion iechyd amgylcheddol, gan gynnwys ansawdd aer, trafnidiaeth gynaliadwy a thir a dŵr halogedig. Byddwch yn rhoi cyngor ac arweiniad seiliedig ar dystiolaeth i gefnogi prosesau gwneud penderfyniadau ar bolisi ac ymarfer yn genedlaethol ac yn lleol.

Advert

Bydd y swydd Arbenigwr Iechyd Cyhoeddus Amgylcheddol newydd hon yn ymuno â Thîm Iechyd Cyhoeddus Amgylcheddol deinamig Iechyd Cyhoeddus Cymru. Rôl allweddol yw hon er mwyn helpu i gyflwyno gwasanaethau iechyd cyhoeddus amgylcheddol yng Nghymru a chynyddu effaith y gwasanaethau. Mae'r Tîm yn cynnwys Ymgynghorwyr mewn Iechyd Cyhoeddus Amgylcheddol, Prif Arbenigwr Iechyd Cyhoeddus Amgylcheddol, cymorth i'r rhaglen a chymorth gweinyddol.

Bydd deiliad y swydd yn meddu ar wybodaeth a sgiliau gwyddonol technegol arbenigol ac yn eu cymhwyso at:

• Helpu i gyflawni rhaglen waith greiddiol y Tîm (gan gynnwys y swyddogaeth “Desg Dyletswydd” adweithiol mewn oriau) i asesu a rheoli risgiau o ddigwyddiadau, ymholiadau ac ymgynghoriadau cysylltiedig ag iechyd cyhoeddus amgylcheddol.
• Asesu risgiau, a helpu i arwain, llywio, cefnogi a gwerthuso camau gweithredu cydweithredol er mwyn mynd i'r afael â llygredd aer yng Nghymru (gan gynnwys gwaith datgarboneiddio cysylltiedig, yn unol â nodau perthnasol y sefydliad a nodau polisi);
• Arwain, llywio a chefnogi datblygiad dangosyddion iechyd cyhoeddus amgylcheddol a thracio/gwyliadwriaeth yng Nghymru a chyfrannu at y gwaith o nodi, gweithredu a gwerthuso camau gweithredu a nodwyd o'r wybodaeth hon.

Rhaid i ddeiliad y swydd allu meddwl a gweithredu mewn modd arloesol a gallu gweithio ar ei liwt ei hun lle y bo'n briodol.

Gweithio i'n sefydliad

Iechyd Cyhoeddus Cymru yw Sefydliad Iechyd y Cyhoedd cenedlaethol Cymru. Ein gweledigaeth yw ‘Gweithio i wireddu dyfodol iachach i Gymru’. Rydym yn chwarae rhan ganolog mewn ysgogi gwelliannau o ran iechyd a llesiant y boblogaeth, lleihau anghydraddoldebau iechyd, gwella canlyniadau gofal iechyd, diogelu'r cyhoedd a chefnogi datblygiad iechyd ym mhob polisi ledled Cymru.

Caiff ein sefydliad ei arwain gan ein gwerthoedd “Cydweithio, gydag ymddiriedaeth a pharch, i wneud gwahaniaeth”. Rydym wedi ymrwymo i greu gweithle cynhwysol sy'n rhoi gwerth ar gydraddoldeb, amrywiaeth a chynhwysiant.  Rydym yn croesawu ceisiadau sy'n cynrychioli amrywiaeth gyfoethog y cymunedau rydym yn eu gwasanaethu a chan y rhai sy'n dymuno gweithio'n rhan amser neu rannu swydd.

I gael rhagor o wybodaeth am weithio i ni, y buddion a gynigiwn a'r arweiniad ar y broses ymgeisio, ewch i https://icc.gig.cymru/gweithio-i-ni/gwybodaeth-a-chanllawiau-i-ymgeiswyr/