Rheolwr Amrywiaeth a Chynhwysiant

Swydd-ddisgrifiad a phrif gyfrifoldebau manwl

A ydych yn ymarferydd cydraddoldeb, amrywiaeth a chynhwysiant profiadol? 

A hoffech fod yn rhan o dîm bach dynamig sy'n gweithio mewn partneriaeth ar draws y rhanbarth i wella canlyniadau a phrofiadau i'n poblogaeth? 

A oes gennych y profiad eang y mae ei angen i reoli'r tîm sy'n gyfrifol am gydlynu a hyrwyddo camau gweithredu i hybu cydraddoldeb, amrywiaeth a chynhwysiant mewn sefydliad sector cyhoeddus mawr sy'n cwmpasu ardal ddaearyddol fawr?

Mae cyfle cyffrous wedi dod ar gael i ymuno â'n tîm yn rôl Rheolwr Amrywiaeth a Chynhwysiant. Yn y rôl hon byddwch yn llysgennad dros greu diwylliant sefydliadol cadarnhaol, ynghyd â hyrwyddo cydraddoldeb, amrywiaeth a chynhwysiant ar gyfer staff, defnyddwyr gwasanaethau, gofalwyr a'n poblogaeth ehangach. 

Bydd deiliad y swydd yn rheoli tîm o staff arbenigol y mae ganddynt rôl o ddarparu cyngor ar strategaeth a pholisi gan eu bod yn arbenigwyr mewnol ar faterion cydraddoldeb ac amrywiaeth. 

Bydd gan ddeiliad y swydd y profiad y mae ei angen i weithio gydag ystod o dimau clinigol ac anghlinigol, gan eu cynghori ar y broses o gynnal asesiadau effaith ar gydraddoldeb sy'n ofynnol i gefnogi datblygiad gwelliannau neu drawsnewidiadau i wasanaethau neu bolisïau sefydliadol. Bydd deiliad y swydd hefyd yn arwain y broses o ddatblygu a darparu hyfforddiant meithrin ymwybyddiaeth mewn sesiynau sefydlu corfforaethol ac i staff ledled ystod eang o ddisgyblaethau, a all hefyd gynnwys sefydliadau 
partner. Yn ogystal â hyn, mae'r tîm yn comisiynu cyngor a chymorth arbenigol i feysydd gwasanaeth a thimau, ac yn chwarae rhan allweddol yn y broses o hwyluso ymgysylltiad â rhanddeiliaid a grwpiau â nodweddion gwarchodedig i sicrhau bod llais staff, defnyddwyr gwasanaethau, teuluoedd, gofalwyr a'r boblogaeth ehangach yn cael ei ystyried a'i
ddefnyddio i siapio dyfodol gwasanaethau. Bydd hyn yn golygu gweithio'n agos gyda'r Tîm Ymgysylltu i hyrwyddo a meithrin cysylltiadau ledled yr holl grwpiau gwarchodedig, yn enwedig â'r rhai sydd, yn draddodiadol, yn profi allgáu neu ymyleiddio. 

Mae'r portffolio yn amrywiol ac yn gyfnewidiol gan ei fod yn ymateb i flaenoriaethau a meysydd gwaith sy'n dod i'r amlwg. 

Rydym yn chwilio am rywun sy'n gallu amlygu sgiliau cyfathrebu llafar ac ysgrifenedig rhagorol, ac sydd â'r medr i drafod a dylanwadu ar bob lefel. Bydd yn rhaid i ddeiliad llwyddiannus y swydd allu gweithio'n dda yn rhan o dîm ond hefyd fod â'r gallu i weithio'n annibynnol a blaenoriaethu er mwyn medru cyflawni yn unol â therfynau amser cytunedig. Bydd angen i chi feddu ar ymagwedd hyblyg at waith, gan fod yn barod i addasu a chroesawu newid a chynnydd. Mae gwybodaeth arbenigol am y cyd-destun polisi a 
deddfwriaethol yn hanfodol, ynghyd ag angerdd dros wella cydraddoldeb a hawliau dynol. 

Mae hon yn swydd lawn-amser am 37.5 awr yr wythnos, gyda pheth gwaith gyda'r nos neu ar benwythnosau i gefnogi gweithgareddau ymgysylltu â'r gymuned. 

Mae'r gallu i siarad Cymraeg yn ddymunol ar gyfer y swydd hon; mae croeso i siaradwyr Cymraeg a/neu Saesneg, fel ei gilydd, wneud cais.

Anogir ymgeiswyr sydd â diddordeb i ffonio i gael rhagor o wybodaeth er mwyn deall cwmpas y rôl yn llawn. 

Byddwch yn gallu dod o hyd i Swydd-ddisgrifiad a Manyleb y Person llawn yn y dogfennau ategol, neu cliciwch ar “Gwneud cais 'nawr” i'w gweld yn Trac. 
Mae'r Bwrdd Iechyd yn ymrwymedig i gefnogi ei staff i gofleidio'r angen am ddwyieithrwydd, gan felly wella profiadau cleifion a defnyddwyr gwasanaethau. Yn rhan o'n hymrwymiad i gynyddu nifer y staff sy'n gallu cyfathrebu yn Gymraeg â chleifion a gweithwyr proffesiynol, rydym yn croesawu ceisiadau gan siaradwyr Cymraeg. 

Mae'r gallu i gyfathrebu yn Gymraeg yn ddymunol ar gyfer y swydd hon. Os nad ydych yn bodloni'r gofynion a nodir o ran y Gymraeg, mae'r Bwrdd Iechyd yn cynnig amrywiaeth o opsiynau dysgu a chymorth i staff i'ch helpu i fodloni'r gofynion dymunol hyn yn ystod eich cyflogaeth gyda ni. 

Cynhelir y cyfweliadu ar 15/11/2023.