Pennaeth Dadansoddi - Gweithrediaeth GIG Cymru (CaCA)

Swydd-ddisgrifiad a phrif gyfrifoldebau manwl

Bydd deilydd y swydd:

• Yn dylunio, creu a datblygu cronfeydd data newydd priodol, adroddiadau a phrosesau cipio data i sicrhau bod rhanddeiliaid mewnol ac allanol yn cael gwybodaeth gywir, o ansawdd uchel lle mae’r prif negeseuon allweddol yn cael eu nodi’n glir i lywio rhagolygon, penderfyniadau ynglŷn â newid gwasanaethau a dulliau o gyflawni gofal iechyd seiliedig ar werth yng Nghymru.
• Yn defnyddio gwybodaeth arbenigol am ymchwil gweithredol a dadansoddi ystadegol i gynhyrchu allbynnau ystyrlon yn unol â rhaglen waith yr Uned.
• Yn gyfrifol am gynllunio a chynnal rhaglenni gwaith cymhleth sy’n ymwneud â’r Pecyn Cymorth Gwerth, Dyrannu, Defnyddio a Dysgu (VAULT), gan addasu’r cynlluniau ar sail y gofynion gan randdeiliaid allweddol yn unol â blaenoriaethau strategol.
• Yn cynnal a rheoli rhaglen waith y Tîm Dadansoddeg, gan ddirprwyo a chydlynu gwaith aelodau’r tîm a rheoli’r trefniadau ar gyfer cyflawni’r gwaith hwn yn unol â’r amserlenni gofynnol. Mae hyn yn cynnwys cysoni setiau sgiliau a chymwyseddau’n unol â dadansoddiadau penodol yn ôl y gofyn.  Disgwylir i allbynnau’r Tîm Dadansoddeg gyfrannu at yr agenda gwerth y cyfeirir ati yn y strategaeth iechyd a gofal cymdeithasol genedlaethol, Cymru Iachach.  Yn benodol, bydd yn newid dadansoddeg y tu hwnt i arbedion costau syml i fod yn asesiad o’r gwerth.  Disgwylir i ddeilydd y swydd hefyd wneud archwiliadau ansawdd o’r holl allbynnau a gynhyrcha’r tîm, gan sicrhau eu bod yn gywir ac yn bodloni anghenion defnyddwyr.  
• Yn gyfrifol am gynllunio a chyflwyno prosiectau strategol a chymhleth o safbwynt meincnodi’r perfformiad ar draws ymddiriedolaethau GIG Cymru er mwyn canfod cyfleoedd i wella effeithlonrwydd ar draws GIG Cymru.
• Yn gweithio gydag aelodau’r tîm i gynnal a datblygu cofrestr asedau gwybodaeth y gyfarwyddiaeth ac yn meithrin perthnasoedd allweddol gydag arweinydd llywodraethu gwybodaeth Iechyd Cyhoeddus Cymru, o safbwynt gofynion y gyfarwyddiaeth fel sy’n ofynnol gan ein sefydliad cynhaliol.
•  Yn gweithio gydag uwch glinigwyr a rheolwyr i gomisiynu gwaith ar brosiectau Gofal Iechyd seiliedig ar Werth i roi cyngor ar anghenion gwybodaeth a dadansoddi data er mwyn cyfrannu at wneud penderfyniadau a gwella gwasanaethau.
• Yn gyfrifol am gyllideb (gyda therfyn dirprwyedig o £1,000), i gefnogi rheolwyr y tîm dadansoddol gan gynhyrchu adroddiadau misol i Ddirprwy Gyfarwyddwr y gyfarwyddiaeth. Bydd gan ddeilydd y swydd hefyd gyfrifoldeb am ddatblygu argymhellion ar gyfer technoleg neu feddalwedd y gellir eu defnyddio er mwyn gallu deall y negeseuon allweddol sy’n deillio o ddata, gwybodaeth a dadansoddiadau yn well.  
• Yn arwain y gwaith o lunio adroddiadau cytbwys ar berfformiad ariannol y GIG gan gefnogi uwch aelodau’r gyfarwyddiaeth yn eu rolau gyda sefydliadau GIG Cymru. Mae hyn yn cynnwys cynhyrchu gwybodaeth i gefnogi cydran ariannol cyfarfodydd uwch-gyfeirio uchel eu proffil ar gyfer y sefydliadau hynny sydd mewn mesurau arbennig, ymyrraeth wedi’i thargedu neu fonitro lefel uwch.  Gellid hefyd ddefnyddio’r allbynnau hyn i fwydo cyfarfodydd allanol eraill megis Pwyllgor Cyfrifon Cyhoeddus Cynulliad Cenedlaethol Cymru.  
• Yn annog eraill i ddefnyddio gwybodaeth i lywio penderfyniadau a darparu cyngor arbenigol hynod gymhleth gan roi ystyriaeth i faterion sy’n ymwneud â gwybodaeth am weithgareddau cynhennus a sensitif.
• Yn paratoi a chyflwyno gwybodaeth gerbron cyfarfodydd uwch randdeiliaid allweddol mewn ffordd effeithiol a phriodol. Mae hyn yn cynnwys y Bwrdd Gwerth a Chynaliadwyedd Cenedlaethol sydd dan gadeiryddiaeth Cyfarwyddwr Cyffredinol GIG Cymru, sef y fforwm a ddefnyddir i ganfod cyfleoedd effeithlonrwydd ar gyfer Byrddau Iechyd ac Ymddiriedolaethau’r GIG ac i fonitro i ba raddau y caiff gwelliannau eu cyflawni yn y meysydd hyn.  O’r herwydd, mae gofyn i’r wybodaeth hon fod yn gwbl gywir ac mae modd iddi fod yn gynhennus a sensitif.  Mae’r allbynnau gwybodaeth, wrth eu natur, yn gymhleth gan eu bod yn golygu cydlynu nifer o ffynonellau data gwahanol, archwilio cywirdeb, cysylltu â sefydliadau meincnodi allanol a chyflwyno data mewn fformat sy’n dangos yn hawdd natur a maint y cyfle.  
• Yn ymchwilio, gwerthuso a chyflwyno unrhyw dechnolegau newydd/ rhag gymwysiadau gan gynnwys meddalwedd deallusrwydd busnes a chysylltu gyda Byrddau Iechyd Lleol, Ymddiriedolaethau, DHCW ac unrhyw randdeiliaid allweddol eraill i ganfod eu gofynion gwybodaeth, yna gwneud gwaith datblygu, gan sicrhau bod anghenion defnyddwyr yn cael eu bodloni’n effeithlon ac effeithiol.
• Yn gwneud gweithgareddau ymchwil i wella effeithlonrwydd yn rheolaidd (un diwrnod yr wythnos), gan gynnwys archwiliadau a dadansoddiadau manwl o berfformiad ar draws y GIG yng Nghymru a Lloegr er mwyn cynnig cynhyrchion effeithlonrwydd newydd i Lywodraeth Cymru.
• Yn arwain y gwaith o ddatblygu sgiliau ymchwiliadau data technegol yn y gyfarwyddiaeth, gan gynnwys cynnal gwybodaeth ddiweddar am yr offer a’r technegau dadansoddi sydd ar gael a chanfod cyfleoedd i ddatblygu’r sgiliau hyn yn y tîm. Bydd disgwyl i ddeilydd y swydd hefyd lunio cynllun hyfforddiant cynhwysfawr ar gyfer y tîm dadansoddwyr, gan sicrhau eu bod yn cadw eu datblygiad personol i safon uchel.  
• Yn goruchwylio a chynnal cronfa ddata o gostau lefel cleifion, fel y’u cyflwynir yn flynyddol gan Fyrddau Iechyd/Ymddiriedolaethau Cymreig ar ran y gyfarwyddiaeth Cynllunio a Chyflawni Ariannol. Sicrhau bod y system yn cydymffurfio â’r Ddeddf Diogelu Data a pholisi diogelwch TG ICC a chynnal cofrestr ddiweddar o ddefnyddwyr y system.
• Yn defnyddio gwybodaeth arbenigol i greu, dylunio a datblygu rhyngwyneb pen blaen ar gyfer y gronfa ddata lefel cleifion gan roi ystyriaeth i anghenion gwahanol randdeiliaid.
• Yn datblygu perthnasoedd allweddol â chydweithwyr yn DHCW er mwyn meithrin dealltwriaeth o’r prosesau a’r diffiniadau data sydd wrth wraidd y trefniadau i gasglu’r set ddata lefel cleifion Cymru gyfan genedlaethol. Yn cyflawni ymarferiadau cysoni diwedd blwyddyn cymhleth rhwng cronfa ddata gweithgaredd genedlaethol ePEDW a gynhelir gan DHCW a’r gronfa ddata lefel cleifion Cymru gyfan a gynhelir gan y gyfarwyddiaeth ac yn gweithio ar y cyd â chydweithwyr yn Ymddiriedolaethau a Byrddau Iechyd Cymru i ddehongli a deall y rhesymau am unrhyw wahaniaethau.
• Yn diweddaru, moderneiddio ac awtomeiddio prosesau sy’n gysylltiedig â chynhyrchu’r gyfres o ddatganiadau costio blynyddol, gan weithredu polisïau cenedlaethol yn yr arena hon. Yn cysoni datganiadau costio blynyddol, fel y’u cyflwynir i’r gyfarwyddiaeth gan Fyrddau Iechyd y GIG, Ymddiriedolaethau a WHSSC, gan sicrhau bod y gwaith wedi’i gydlynu a’i gwblhau o fewn gofynion Costio Cymru ac amserlenni Llywodraeth Cymru.
• Yn cyfrannu at lunio dangosyddion perfformiad ar gyfer Byrddau Iechyd/Ymddiriedolaethau yng Nghymru a sefydlu fframwaith monitro i sicrhau y gellir mesur ac adrodd ar berfformiad gwasanaethau mewn ymateb i ofynion lleol a chenedlaethol.
• Yn cynnig newid mewn polisïau sy’n effeithio ar bob Ymddiriedolaeth GIG ar draws Cymru. E.e. yn gyfrifol am adolygu, diweddaru a gweithredu’r polisi Defnyddio Mynediad
• Yn cynhyrchu a dosbarthu dadansoddiadau o berfformiad fel mater o drefn er mwyn cefnogi cylch o welliant parhaus.
• Yn llunio adroddiadau sy’n cynnwys gwybodaeth yn ymwneud â chleifion fel sy’n ofynnol gan gynorthwyo â rhagolygon gweithgareddau Cymru gyfan a chynllunio strategol Cymru gyfan.
• Yn dylunio a pharatoi adroddiadau newydd ar gais uwch aelodau’r gyfarwyddiaeth i ddatrys problemau penodol ac ymholiadau dadansoddol pan godant.
• Yn gwneud adolygiadau dadansoddol yn aml ac fel mater o drefn ar gronfeydd data mawr o ddata costio Cymru gyfan cymhleth, gwneud archwiliad o’r broses gostio gyfredol a chanfod unrhyw anghysondebau. Bydd hyn yn gofyn am gyfnodau o ganolbwyntio dwys iawn yn aml i sicrhau cywirdeb yr allbynnau.  
• Yn darparu cyngor arbenigol a hyfforddiant ar wybodaeth ddadansoddol ac ystadegol gymhleth iawn i randdeiliaid fel y bo’n briodol, gan weithredu fel cefnogaeth systemau rheng flaen ar gyfer datblygiadau newydd a’i gwneud yn haws i wybodaeth feincnodi a chostio ariannol gael ei defnyddio ar draws y sefydliad a gan randdeiliaid allweddol eraill.
• Yn datblygu delweddiadau data a’r technegau delweddu/dadansoddi mwyaf effeithiol i gefnogi allbynnau’r gyfarwyddiaeth.
• Yn cefnogi’r gwaith o ddatblygu data i gefnogi’r agenda gofal iechyd seiliedig ar werth, gan gyplysu ag arweinyddion clinigol cenedlaethol i ddeall y gofynion gwybodaeth er mwyn bwrw blaenoriaethau allweddol ymlaen.
• Yn cyplysu â’r gyfarwyddiaeth Perfformiad a Sicrwydd a’r tîm Deallusrwydd Digidol ar ddulliau dadansoddol, methodoleg a chyd-ddarnau o waith dadansoddol.

Yn ogystal, bydd y swydd hon yn defnyddio fframwaith ymarfer gorau “Managing Successful Programmes”, Swyddfa Masnach y Llywodraeth (OGC), wedi’i ategu gan drefniadau rheoli prosiectau sy’n defnyddio methodoleg “PRINCE2”.