Gwyddonydd Data Epidemiolegol (Uwch)

Trosolwg o'r swydd

Mae’r Is-adran Diogelu Iechyd yn darparu gwybodaeth a chyngor ac yn cymryd camau i amddiffyn pobl yng Nghymru rhag clefydau heintus a pheryglon amgylcheddol. Canolfan Wyliadwriaeth Clefydau Trosglwyddadwy (CDSC) yw'r gangen epidemioleg a gwyliadwriaeth o Adran Diogelu Iechyd.

Mae hon yn rôl uwch a fydd yn datblygu'r defnydd o dechnegau gwyddor data i gefnogi gwaith CDSC. Bydd deiliad y swydd yn datblygu modelau mathemategol ac epidemiolegol sy'n efelychu lledaeniad clefydau heintus. Bydd deiliad y swydd yn datblygu dulliau a phrosesau i gynnal y systemau gwyliadwriaeth presennol a sefydlu rhai newydd. Bydd hyn yn cynnwys rheoli, cynnal a chadw a gwella ansawdd llif data i CDSC Bydd deiliad y swydd yn gweithio gydag uwch epidemiolegwyr i weithredu dulliau sy'n dod i'r amlwg mewn gwyddor data fel cysylltu data a dysgu peiriannau ac archwilio posibiliadau deallusrwydd artiffisial. Bydd deiliad y swydd hefyd yn gweithio'n agos gyda microbiolegwyr i ddatblygu dulliau gwyliadwriaeth newydd gan ddefnyddio canlyniadau dilyniannu genomau cyfan pathogenau, a bydd ganddo rôl hefyd wrth gefnogi gweithgareddau epidemioleg maes.

Advert

Bydd deiliad y swydd yn defnyddio sgiliau datblygedig iawn mewn gwyddor data, gwybodeg iechyd a rheoli prosiectau i ddiffinio, dehongli a darparu atebion i broblemau iechyd cyhoeddus cymhleth. Bydd hyn yn cynnwys fframio problemau mewn termau epidemiolegol, dadansoddi setiau data cymhleth, sicrhau bod allbynnau o brosiectau yn cael eu cyflawni mewn pryd ac adrodd ar ganfyddiadau i randdeiliaid, gan gynnwys y cyhoedd, gweithwyr iechyd proffesiynol yn Iechyd Cyhoeddus Cymru, y GIG, Byrddau Iechyd a Llywodraeth Cymru.

Bydd deiliad y swydd yn datblygu ac yn darparu hyfforddiant ar amrywiaeth o bynciau. I wneud hyn, bydd gofyn i ddeiliad y swydd gysylltu ag unigolion o gefndiroedd amrywiol mewn amrywiaeth o sefydliadau.

Efallai y bydd gofyn i ddeiliad y swydd fod yn rheolwr llinell a/neu gydlynu gwaith aelodau iau o’r tîm. Bydd gofyn iddo hyfforddi staff, goruchwylio neu fentora staff iau a dangos tasgau penodol neu waith fel bo angen i eraill.

Bydd deiliad y swydd yn cyfrannu at Strategaeth Ymchwil Iechyd Cyhoeddus Cymru drwy ymgymryd â gweithgareddau ymchwil a datblygu a allai gynnwys paratoi ceisiadau am gyllid.  Bydd disgwyl i ddeiliad y swydd weithio o fewn unrhyw gyllidebau a bennir gan yr adran ond disgwylir iddo wneud argymhellion ar gyfer dyrannu adnoddau yn y ffordd fwyaf priodol.

Gweithio i'n sefydliad

Ni yw Iechyd Cyhoeddus Cymru - asiantaeth iechyd cyhoeddus genedlaethol Cymru. Ein diben yw ‘gweithio gyda'n gilydd ar gyfer Cymru iachach'. Rydym yn bodoli i helpu pawb yng Nghymru i fyw bywydau hirach, iachach. Gyda'n partneriaid, ein nod yw cynyddu disgwyliad oes iach, gwella iechyd a llesiant, a lleihau anghydraddoldebau i bawb yng Nghymru, nawr ac ar gyfer cenedlaethau'r dyfodol. 

Gyda'i gilydd, mae ein timau'n gweithio i atal clefyd, diogelu iechyd, a darparu arweinyddiaeth, gwasanaethau arbenigol ac arbenigedd iechyd cyhoeddus. Ni yw'r brif ffynhonnell o wybodaeth, ymchwil ac arloesedd iechyd cyhoeddus yng Nghymru. Nid yw iechyd cyhoeddus erioed wedi bod mor bwysig wrth i ni ddod drwy bandemig y Coronafeirws, wynebu heriau'r argyfwng costau byw a mynd i'r afael ac atal effeithiau niweidiol newid hinsawdd.

Caiff ein sefydliad ei arwain gan ein gwerthoedd 'Cydweithio, gydag ymddiriedaeth a pharch, i wneud gwahaniaeth'. Rydym wedi ymrwymo i greu gweithle cynhwysol sy'n rhoi gwerth ar gydraddoldeb, amrywiaeth a chynhwysiant.  Rydym yn croesawu ceisiadau sy'n cynrychioli amrywiaeth gyfoethog y cymunedau rydym yn eu gwasanaethu a chan y rhai sy'n dymuno gweithio'n rhan amser neu rannu swydd.

I ddarganfod mwy am weithio i ni a'r buddion rydym yn eu cynnig, ewch i Gyrfaoedd - Iechyd Cyhoeddus Cymru (gig.cymru)

I gael arweiniad ar y broses ymgeisio, ewch i Gwybodaeth a Chanllawiau i Ymgeiswyr - Iechyd Cyhoeddus Cymru (gig.cymru)