Therapydd Seicolegol

Trosolwg o'r swydd

Mae'r swydd hon yn cael ei hysbysebu ar lefel Band 6, ac yn ddelfrydol bydd yr ymgeiswyr ar gyfer y rôl hon eisoes wedi sicrhau achrediad gyda Chymdeithas Cwnsela a Seicotherapi Prydain (BACP) neu Gymdeithas Seicotherapi Ymddygiadol a Gwybyddol Prydain (BABCP). Fodd bynnag, anogir ymgeiswyr nad ydynt yn meddu ar yr achrediad gofynnol ar 
gyfer y rôl Band 6 ar hyn o bryd, ond y maent yn bodloni'r holl ofynion cymhwystra sy'n ofynnol ar gyfer cael eu hachredu, i wneud cais. Os byddant yn llwyddiannus, bydd angen iddynt gyflwyno eu cais i gael eu hachredu cyn pen chwe mis ar ôl y dyddiad dechrau, a chânt eu penodi dan reolau Atodiad 21 Cymru Gyfan. Mae hyn yn golygu y byddant yn 
cael eu cefnogi gan gynllun datblygu. (Yn ystod y flwyddyn gyntaf, bydd y taliad yn 75% o'r gyfradd cyflog uchaf ym Mand 6, ac ar ôl cael yr achrediad bydd deiliad y swydd yn cael ei dalu ar Fand 6 (pwynt isaf y raddfa)). Darperir cymorth a goruchwyliaeth er mwyn 
datblygu'r ymgeisydd llwyddiannus ar gyfer y rôl Band 6. Gallai peidio â sicrhau'r achrediad a'r cymwyseddau gofynnol yn unol â'r amserlen ddynodedig arwain at adleoli.

Mae'n bleser gennym rannu'r cyfle hwn i therapydd seicolegol medrus a phrofiadol iawn ymuno â Gwasanaeth Llesiant Seicolegol y Staff mewn rôl unigryw ac amrywiol. Byddwch yn gwneud gwahaniaeth ystyrlon i staff y GIG, yn gweithio mewn amgylchedd tîm cefnogol, yn elwa o weithio'n hyblyg ac yn cael y cyfle i gyfrannu at arfer arloesol a chydweithio.

Advert

Mae llesiant y staff yn flaenoriaeth allweddol yn Hywel Dda, ac mae staff, rheolwyr ac uwch-arweinwyr yn rhoi gwerth uchel ar ein gwasanaeth. Rydym yn chwilio am Therapydd Seicolegol profiadol, hunanysgogol a brwdfrydig i ddarparu therapi seicolegol arbenigol byrdymor i'n staff. Byddwch hefyd yn cael y cyfle i gyfrannu at ymyriadau grŵp a rhaglenni seico-addysgol.

Mae cymhwyster proffesiynol mewn Therapi Gwybyddol Ymddygiadol neu Gwnsela hyd at o leiaf lefel Diploma yn hanfodol, ynghyd ag achrediad (neu'n barod i wneud cais am achrediad) gan gorff proffesiynol cydnabyddedig megis y BABCP neu'r BACP ac aelodaeth gyfredol ohono. Os ydych eisoes wedi sicrhau achrediad, rydym yn eich annog i nodi'r manylion hyn yn glir ar eich ffurflen gais. Mae profiad ôl-gymhwyso sylweddol mewn gwaith cleientiaid amlddisgyblaethol gydag oedolion yn hanfodol, gan gynnwys asesu, gwaith byr sy'n canolbwyntio ar atebion, a phrofiad o gwnsela yn y gweithle. 

Byddwch yn hyderus i asesu a rheoli materion megis risg, diogelu, a gwrthdaro buddiannau, a byddwch yn gallu cyrchu cymorth o fewn ein tîm a gwasanaethau cynghori arbenigol eraill yn y Bwrdd Iechyd.

Mae'r gallu i siarad Cymraeg yn ddymunol ar gyfer y swydd hon; Mae croeso cynnes i siaradwyr Cymraeg a / neu Saesneg wneud cais.

Gweithio i'n sefydliad

Bwrdd Iechyd Prifysgol Hywel Dda yw cynllunydd a darparwr gwasanaethau gofal iechyd y GIG i bobl yn Sir Gaerfyrddin, Ceredigion, Sir Benfro a’r siroedd cyfagos. Mae ein 12,000 o staff yn darparu gwasanaethau sylfaenol, cymunedol, mewn ysbytai, iechyd meddwl ac anableddau dysgu i bron 400,000 o bobl ar draws chwarter ehangdir Cymru. Gwnawn hyn mewn partneriaeth a’n 3 awdurdod lleol a chydweithwyr yn y sector cyhoeddus, y sector preifat a’r trydydd sector, gan gynnwys ein gwirfoddolwyr, drwy:

4 prif ysbyty (Bronglais, Aberystwyth, Glangwili, Caerfyrddin, Tywysog Philip, Llanelli, ac Llwynhelyg, Hwlffordd).

5 ysbyty cymunedol (Ysbyty Dyffryn Aman ac Ysbyty Llanymddyfri yn Sir Gaerfyrddin, Ysbyty Tregaron yng Ngheredigion,Ysbyty Dinbych-y-pysgod a Chanolfan Adnoddau Iechyd a Gofal Cymdeithasol De Sir Benfro yn Sir Benfro.

Dwy ganolfan gofal integredig (Aberaeron ac Aberteifi, yng Ngheredigion). 
Cyfleusterau cymunedol, gan gynnwys:

48 Meddygfa, 49 Deintyddfa, 98 Fferyllfa Gymunedol, 44 Practis Offthalmig Cyffredinol (gan gynnwys gwasanaethau iechyd llygaid a golwg gwan), 38 safle yn darparu gwasanaethau iechyd meddwl ac anableddau dysgu, gofal o fewn eich cartrefi eich hun

Gwasanaethau tra arbenigol a thrydyddol a gomisiynir gan Bwyllgor Gwasanaethau Iechyd Arbenigol Cymru, cydbwyllgor sy'n cynrychioli 7 bwrdd iechyd ledled Cymru.