Ymarferydd Cynorthwyol - Gwasanaeth Niwroddatblygiadol

Swydd-ddisgrifiad a phrif gyfrifoldebau manwl

Mae gofyn bod gan ddeiliad y swydd lefel uchel o sgiliau cyfathrebu sy’n ei alluogi i weithio gyda phlant sydd ag anawsterau ymddygiad, ac sydd o bosibl ag anawsterau Niwroddatblygiadol neu wedi cael diagnosis o hynny. Efallai y bydd disgwyl i ddeiliad y swydd hefyd gyfathrebu ag unigolion sydd o bosibl wedi cael diagnosis o anhawster/anabledd dysgu, a’u teuluoedd/gofalwyr a allai fod ag anghenion tebyg eu hunain.

Mae lefelau uchel o sgiliau geiriol a di-eiriau yn ei gwneud yn bosibl i ffurfio perthnasoedd therapiwtig ac ymddiriedus gyda phlant y mae'n aml yn anodd ymgysylltu â nhw oherwydd anawsterau prosesu a deall, neu anawsterau rhyngweithio neu gyfathrebu cymdeithasol oherwydd cyflwr Niwroddatblygiadol.

Mae angen sgiliau cyfathrebu ar ddeiliad y swydd, gan ddefnyddio’r lefel uchaf o sgiliau rhyngbersonol gyda theuluoedd a gweithwyr proffesiynol. Mae enghreifftiau’n cynnwys cyfarfodydd Tîm Amlddisgyblaethol proffesiynol lle mae anghytuno ynghylch opsiynau triniaeth. Bydd angen negodi, sy’n gofyn am gyfleu darnau cymhleth o wybodaeth, gan sicrhau bod darlun llawn a chywir o ymgyflwyniad (presentation) cymhleth y plentyn yn cael ei gyfleu.

Mae angen cyfathrebu mewn awyrgylch emosiynol sy’n gallu bod yn sensitif iawn, gan gynnwys trafod gwybodaeth a allai achosi tramgwydd fel amheuaeth o broblemau diogelu a chyfathrebu â rhieni/gofalwyr ynghylch materion sy’n ymwneud ag esgeulustod neu anallu'r rhieni i gadw eu plentyn yn ddiogel.

Mae’n rhaid i ddeiliad y swydd gyflwyno rhaglenni/canllawiau blaengar ar gyfer ymddygiad ac ymyriadau teuluol sy’n seiliedig ar dystiolaeth, yn aml i ofalwyr/teuluoedd cleientiaid sydd ag ymddygiad anodd. Mae hynny'n gofyn am gyfathrebu'n sensitif, yn enwedig os oes gwrthwynebiad. Gall deiliad y swydd ddarparu, derbyn a chymathu gwybodaeth gymhleth a sensitif iawn yn fedrus, pan fydd rhwystrau sylweddol o bosibl o ran derbyn yr hyn sy’n digwydd. Mae angen crebwyll cymhleth a chyfathrebu'n sensitif yn aml mewn sefyllfaoedd pan ofynnir yn ystod y broses asesu am gyngor ynghylch rheoli ymddygiad/cwsg/trefn arferol ac ati.

Cyfathrebu ar faterion sy’n ymwneud ag amddiffyn plant gyda theuluoedd/gweithwyr cymdeithasol/ysgolion a gweithwyr proffesiynol eraill sy’n ymwneud â lles y Plentyn.

Rhaid i ddeiliad y swydd ystyried nifer o agweddau cymhleth nad oes, yn aml, atebion/opsiynau amlwg ar eu cyfer. Mae angen dadansoddiad cymhleth iawn a dehongli a chymharu ystod o opsiynau yn aml. Gwelir hyn hefyd os bydd deiliad y swydd yn chwilio am amrywiaeth o opsiynau, fel cartref teuluol y plentyn yn chwalu, lleoliad yn dod i ben, a chydweithio â thîm aml-asiantaeth priodol. Helpu ymarferwyr i gynnal asesiadau arbenigol, manwl sy’n seiliedig ar dystiolaeth pan fydd angen mewn amrywiaeth o sefyllfaoedd, gyda deiliad y swydd yn helpu ymarferwyr i lunio pecynnau gofal ac ymyriadau sy’n seiliedig ar dystiolaeth.

Mae asesiadau arbenigol manwl yn cynnwys:

Arsylwi mewn ysgolion; mae’n rhaid i ddeiliad y swydd ddehongli ac asesu ymgyflwyniad plentyn, a gwneud penderfyniad ar sail gwybodaeth ynghylch a oes gan y plentyn anawsterau Niwroddatblygiadol. Disgwylir i ddeiliad y swydd hefyd fod â gwybodaeth am ddatblygiad plant i gefnogi diagnosis gwahaniaethol.

Wrth wneud asesiad sgrinio cychwynnol, mae angen sgiliau dadansoddi a chrebwyll hynod sensitif a medrus wrth brosesu atgyfeiriadau newydd, gan asesu’r wybodaeth a roddwyd a gwneud penderfyniad ar sail gwybodaeth a defnyddio crebwyll pan fydd angen cymorth pellach gan aelod uwch o’r tîm.

Cynnal asesiadau risg ffurfiol oherwydd y posibilrwydd bod amrywiaeth o broblemau eraill fel hunan-niweidio, sy’n galw am sgrinio a chyfeirio a dogfennu priodol. Mae gwahanol dimau’n defnyddio gwahanol adnoddau ar gyfer asesiad sgrinio/cychwynnol, ac mae deiliad y swydd wedi gweithio gyda’r dulliau amrywiol hyn.

Cynorthwyo ymarferwyr iechyd meddwl gydag ymholiadau a chyngor o fewn CAMHS.

Mae hyn yn gofyn am yr un lefel o sgiliau a chrebwyll dadansoddol wrth weithio mewn partneriaeth â’r ymarferydd a’r rhiant i benderfynu ar y nodau i’w gosod. Gall hyn gynnwys gwybodaeth ac arweiniad yn y fan a’r lle, defnyddio ei wybodaeth a’i brofiad ei hun, a chael amcan o sgiliau’r teuluoedd eu hunain, yn ogystal â gwneud penderfyniadau ynghylch cyfeirio ac asesiadau pellach i’w cyflwyno i gyfarfodydd tîm, lle bydd deiliad y swydd yn y sefyllfa orau i allu bwrw ymlaen â’r ystod o lwybrau.

Mae’n rhaid i ddeiliad y swydd gynnal galwadau ymgynghori, gan wneud asesiadau yn y fan a’r lle ar anghenion y galwyr. Gall hyn gynnwys rheoli sefyllfaoedd risg, ffrwyno rhwystredigaeth y rhieni a chydweithio â gweithwyr iechyd proffesiynol eraill i leddfu sefyllfaoedd a allai achosi risg i’r galwr ac i eraill ar eu liwt eu hunain oherwydd nad yw uwch aelodau staff ar gael ar unwaith o bosibl.

Sgiliau cyfrifiadurol a TG.

Creu adnoddau priodol o fewn cyllideb gyfyngedig.

Wedi cael ei hyfforddi ar dechnegau tawelu ac ymwahanu, a’r angen i barhau’n ymwybodol o ystum/agosrwydd y corff wrth weithio ochr yn ochr â phlant/pobl ifanc a allai ymddwyn yn heriol.

Trin a thrafod cyfarpar, gan gynnwys symud a thrin bocsys cyfarpar asesu sy’n seiliedig ar chwarae (hynny yw, blychau chwarae ADOS). Hefyd, symud a thrin bocsys o adnoddau/deunyddiau hyfforddi wrth wneud hyfforddiant/gwaith grŵp.

Asesiad corfforol sy’n seiliedig ar chwarae sy’n gofyn am symudiadau corfforol, ar gyflymder y plentyn wrth y bwrdd ac ar y llawr, gyda deiliad y swydd yn addasu symudiadau ei gorff ei hun i ddelio â gofynion y plentyn.

Defnyddio sgiliau chwarae corfforol a chwarae rôl i ddangos i rieni sgiliau ac egwyddorion y rhaglen magu plant ar gyfer y blynyddoedd rhyfeddol.

O dan y rhaglen ofal, bydd deiliad y swydd yn gyfrifol am gynnal asesiadau ar gyfer plant sydd ag anghenion Niwroddatblygiadol, am gynllunio, darparu, monitro a gwerthuso’r gofal angenrheidiol ar gyfer pecyn gofal y plentyn. Mae’n rhaid i ddeiliad y swydd hefyd greu pecynnau gofal arbenigol ar gyfer y rheini sydd ag anghenion gofal heriol iawn yn ôl staff uwch, o dan oruchwyliaeth uniongyrchol ac anuniongyrchol uwch aelodau staff.

Mae’n rhaid i ddeiliad y swydd roi cyngor i deuluoedd/gweithwyr cymdeithasol/gofalwyr, staff cymorth seibiant, ysgolion ar reoli’r gofal a ddarperir i blant sydd ag anghenion cymhleth iawn.

Deall polisïau ar gyfer oedolion agored i niwed (rhieni) sydd ag anableddau dysgu.

Gweithio’n unol â pholisïau diogelu plant a chofnodi, rhoi gwybod a gweithredu bob amser pan fydd hynny’n briodol.

Bydd deiliad y swydd yn datblygu’r gwasanaeth ac yn cyfrannu at y gwaith o weithredu polisïau sy’n effeithio ar y gwasanaeth ehangach, gan gynnwys croesawu, ymarfer a chwilio am ffordd gadarnhaol o symud ymlaen i integreiddio’r tîm yn y tîm Niwroddatblygiadol ehangach.

Cadw at bolisïau a gweithdrefnau'r ymddiriedolaeth.

Gwybodaeth am y ddeddf plant.

Ymwybyddiaeth o’r ddeddfwriaeth sy’n ymwneud â’r ddeddf galluedd meddyliol.

Dangos ei ddyletswyddau ei hun ac ati i fyfyrwyr sydd ar leoliad.

Dangos ei ddyletswyddau ei hun i staff newydd yn y gwasanaeth.

Cymhwyster proffesiynol hyd at NVQ Lefel 3 mewn Iechyd a Gofal Cymdeithasol, a phrofiad o weithio ym maes cyflyrau Niwroddatblygiadol. Bydd gan ddeiliad y swydd gyfrifoldeb i sicrhau bod ei holl hyfforddiant gorfodol yn gyfredol, ac i roi sylw i ddiweddariadau asesu risg blynyddol.

Efallai y bydd disgwyl i ddeiliad y swydd ymgymryd â hyfforddiant datblygiad proffesiynol pellach, gan gynnwys hyfforddiant ar anhwylderau fel Anhwylder Ymlyniad, asesiadau risg CAMHS a hyfforddiant ar ymyriadau a grwpiau ar gyfer teuluoedd.

Bydd yr wybodaeth a ddysgwyd drwy ddatblygiad proffesiynol parhaus yn cael ei chymhathu mewn ymarfer a phrofiad, er mwyn galluogi deiliad y swydd i gael gwybodaeth arbenigol ar draws ystod o ymyriadau sy’n seiliedig ar theori ac ymarfer sy’n seiliedig ar dystiolaeth.

Roedd y maes arbenigol penodol yn cynnwys datblygu dealltwriaeth arbenigol o ffyrdd o weithio ym maes anawsterau Niwroddatblygiadol. Roedd y rhain yn cynnwys hunan-barch, iselder, gorbryder, ffobias a chyfathrebu/ymddygiad. Mae hyn yn rhoi cyfle i ddeiliad y swydd helpu ymarferwyr i gynllunio gofal, ac i ddefnyddio gwybodaeth am lwybrau a chanllawiau gyda theori sy’n cael ei llywio gan rieni/gofalwyr.

Bydd deiliad y swydd yn defnyddio ei sgiliau i ddadansoddi a dehongli ymgyflwyniad ac ymddygiad plentyn, yn enwedig yn yr ysgol. Yna, bydd yn rhaid i ddeiliad y swydd wneud penderfyniad clinigol ynghylch a yw ymarweddiad y plentyn yn arwydd o gyflwr Niwroddatblygiadol neu a oes unrhyw ffactorau eraill, gan gynnwys anawsterau datblygu posibl neu brofiadau niweidiol yn ystod plentyndod. Yna, gofynnir i ddeiliad y swydd gyflwyno’r wybodaeth hon mewn ffordd sy’n cyfrannu at y penderfyniad asesu a diagnostig cyffredinol.

Mae angen sgìl wrth gyfleu i’r rhieni bod digon o wybodaeth asesu i warantu asesiad Niwroddatblygiadol, heb roi’r argraff y bydd diagnosis pendant, gan fod yr holl wybodaeth yn cael ei thrafod fel rhan o’r broses adborth aml-ddisgyblaethol.

Bydd deiliad y swydd yn cynorthwyo ymarferwyr o fewn y tîm a thimau ehangach ar faterion sy’n ymwneud â meysydd arbenigol penodol, hynny yw Awtistiaeth ac anabledd dysgu, wrth arwain y gwaith o ddatblygu gwasanaethau a darparu gwasanaethau. Cynhelir trafodaeth reolaidd drwy gyfarfodydd tîm, sy’n cynnwys yr holl dimau y mae deiliad y swydd yn rhan ohonynt, a goruchwyliaeth. Mae hyn yn cynnwys cynorthwyo gweithwyr proffesiynol wrth ddatblygu llwybrau priodol ac ymateb y gwasanaeth ar sail theori, gan roi cyngor ar anabledd dysgu ac awtistiaeth i arbenigwyr eraill – er enghraifft cydweithwyr band 6 / 7, seicolegwyr sydd newydd gymhwyso – a hefyd i rai nad ydynt yn arbenigwyr, hynny yw rhieni/gofalwyr a gweithwyr proffesiynol eraill.

Bydd deiliad y swydd wedi mynd ati ar ei liwt ei hun i ymgyfarwyddo â’r broses asesu Niwroddatblygiadol a chael profiad ohoni, drwy gysgodi aelodau eraill o’r tîm a defnyddio’r deunyddiau hyfforddi, a gofyn am oruchwyliaeth a thrafodaeth.